Bu gündən etbibarən Ermənistanda «Azərbaycan həftəsi» keçirilir. Tədbir Yerevan məktəblərinin birində Aşot Bleyanın rəhbərlik etdiyi «Mxitar Sebastatsi» təhsil mərkəzində təşkil olunur. Bu haqda «Azadlıq» radiosunun erməni xidməti məlumat yayıb.

Tədbirə Azərbaycandan da nümayəndə heyəti qatılacaq. Onlar arasında yazıçı Seymur Baycan, Helsinki Vətəndaş Assambleyasının Azərbaycan bölməsindən nümayəndələr və başqa hüquq müdafiəçiləri də var.
«Azərbaycan həftəsi» müddətində məktəbin şagirdləri «Azərbaycanı necə təsəvvür edirəm», «Ermənistanla Azərbaycanın gələcəyini necə görürəm» mövzusunda inşa yazacaqlar. Bundan başqa, iştirakçılara «Sərhədləri açın!» filmi göstəriləcək. Luiza Poqosyanın bu filmi Ermənistanda və Dağlıq Qarabağda çəkilib.
Tədbirin təşkilatçılarından biri də Böyük Britaniyanın Ermənistandakı səfirliyidi. 
«Mxitar Sebastatsi» dövlət məktəbidi. Amma məktəbin direktoru - Ermənistanın keçmiş Təhsil naziri və bir neçə il həbsdə yatan Aşot Bleyanı daha çox Azərbaycanyönlü mövqe tutmaqda ittiham edirlər. Bleyan Azərbaycan torpaqlarının işğal edilməsinin əleyhinədi. Həm Azərbaycanla, həm də Türkiyə ilə yaxın münasibətlər qurulmasının tərəfdarıdı.
Xəbərdə adı çəkilən yazıçı Seymur Baycan "QayNar"a açıqlamasında, Ermənistanda "Azərbaycan həftəsi" layihəsinin həyata keçiriləcəyindən məlumatlı olduğunu bildirsə də, amma özünün də oarada iştirak edəcəyi xəbərini ilk dəfə bizdən eşitdiyini dedi.